Código Cero - Diario Tecnolóxico de Galicia

Apple Music incremento o prezo da súa subscrición

Redacción — 2026-07-17T20:46:00Z

Apple aplicou unha nova subida de prezos en Apple Music que xa está en vigor en España e no resto da Unión Europea. Trátase do primeiro incremento das tarifas do servizo de música en streaming desde 2022 e afecta ás modalidades Individual, Familiar e Estudante.
Segundo recolle Music Business Worldwide, o aumento responde ao incremento dos custos asociados ás licenzas do catálogo musical. Os novos importes xa aparecen reflectidos na páxina oficial do servizo e aplícanse de inmediato ás novas altas. No caso dos actuais subscritores, o habitual é que o novo prezo entre en vigor na seguinte renovación da subscrición.
O plan Estudante pasa de 5,99 a 6,99 euros ao mes, mentres que o Individual sobe de 10,99 a 11,99 euros mensuais. O incremento máis notable corresponde ao plan Familiar, que aumenta 3 euros e queda fixado en 19,99 euros ao mes, fronte aos 16,99 euros anteriores.
Esta é a segunda subida de prezos que experimenta Apple Music desde o seu lanzamento en 2015 e a primeira en catro anos. A pesar do incremento, a frecuencia dos axustes continúa sendo inferior á doutros servizos de música en streaming, que revisaron as súas tarifas en varias ocasións nos últimos anos.
A actualización de prezos non se limita a Europa. Apple tamén modificou as tarifas de Apple Music en mercados como EE.UU. e o Reino Unido, e prevé estender a medida ao resto dos países nos que o servizo está dispoñible.
O aumento coincide con cambios noutros servizos da compañía nalgúns mercados. Os plans Familiar e Premium de Apple One tamén incrementaron o seu prezo en EE.UU. pero, polo momento, en España permanecen sen cambios.

Rianxo acolle un campamento dixital a partir do día 20 para a rapazada

S. P. — 2026-07-17T20:03:00Z

O Concello de Rianxo vai celebrar a vindeira semana un campamento dixital impulsado pola Fundación Cibervoluntarios, co apoio do Ministerio de Dereitos Sociais, Consumo e Axenda 2030. Será entre os días 20 e 23 de xullo, na Aula de Informática do centro Sociocultural do Auditorio Municipal, con inscricións abertas en liña.
O Campamento Dixital de Cibervoluntarios é un programa gratuíto de actividades presenciais para que nenos, nenas e adolescentes de 9 a 13 anos aprendan a moverse mellor na Internet desde a creatividade, o pensamento crítico e o uso seguro da tecnoloxía.
Trátase “dunha proposta flexíbel e práctica para aprender facendo a través de xogos, retos e actividades colaborativas”, informou o Concello.

Carballo impulsa o talento novo cos seus campamentos infantís sobre robótica, IA e ciberseguridade

S. P. — 2026-07-17T19:02:00Z

A Aula CeMIT de Carballo acolleu este 17 de xullo a clausura e entrega de diplomas do primeiro dos catro campamentos tecnolóxicos de verán organizados pola Concellaría de Innovación. O alcalde de Carballo, Daniel Pérez; o concelleiro de Innovación, Iván Andrade, e a concelleira de Educación, Mar Eirís, foron os encargados de acompañar á rapazada nesta xornada de peche e entregar os recoñecementos que acreditan a súa participación.
Este primeiro grupo, denominado Pequenos exploradores e dirixido a nenos e nenas de 7 e 8 anos, completou con éxito dez días de formación lúdica de luns a venres. Ao longo destas dúas semanas, os máis pequenos tiveron o seu primeiro contacto coa tecnoloxía a través de historias dixitais, debuxo, animación e robótica básica, e remataron coa elaboración dun proxecto interactivo.
O concelleiro de Innovación, Iván Andrade, amosou a súa satisfacción polo desenvolvemento desta primeira quenda e lembrou que o obxectivo desta iniciativa é “que a mocidade de Carballo non sexa só consumidora de tecnoloxía, senón que aprenda a ser creadora, e para iso debemos proporcionarlles ferramentas que lles dean autonomía e seguridade no mundo dixital actual”.
Do mesmo xeito, a concelleira de Educación, Mar Eirís, quixo destacar a metodoloxía destas actividades: “É moi satisfactorio ver como a través do xogo e da experimentación, os nenos e nenas absorben conceptos complexos de lóxica e matemáticas sen darse conta, reforzando a súa aprendizaxe de cara ao vindeiro curso escolar”.
A iniciativa estruturouse en catro campamentos independentes de 14 alumnos/as cada un co fin de garantir unha atención totalmente personalizada e chegar a un total de 56 mozos e mozas do municipio.
A actividade na Aula CeMIT no para e este vindeiro luns, 20 de xullo, dará comezo o segundo dos bloques programados, Futuros exploradores (para idades de 9 a 10 anos). Neste obradoiro, o alumnado mergullarase no deseño de videoxogos e na linguaxe de programación Scratch.
Durante o mes de agosto completarase o calendario coas quendas de Futuros makers (11-12 anos), onde se abordará o deseño 3D e a intelixencia artificial para nenos, e Makers avanzados (13-14 anos), orientada a adolescentes con contidos específicos de edición de vídeo, creación de mini páxinas web, deseño en Canva, podcast e seguridade dixital.
Con este programa global, como apuntou o alcalde, o Concello de Carballo continúa reforzando o seu compromiso estratéxico coa alfabetización dixital, o pensamento computacional e a capacitación práctica das novas xeracións nas ferramentas dixitais do futuro. “Apostar por este tipo de campamentos é investir en igualdade de oportunidades e no Carballo do mañá”, destacou Daniel Pérez.

Redmagic presenta unha tableta orientada a xogar

Redacción — 2026-07-17T18:17:00Z

A marca chinesa Redmagic prepara o lanzamento global da Redmagic Astra 2, unha tableta de 9,06 polgadas pensada para quen busca un dispositivo Android capaz de manter ritmos de xogo intensos sen comprometer nin o rendemento nin a estabilidade térmica. Chegará ao mercado internacional en agosto cun prezo de partida de 699 euros para o modelo con 12 GB de RAM e 256 GB de almacenamento (por 100 euros máis inclúe 16 GB de RAM e 512 GB de capacidade).
Destaca pola integración do procesador Snapdragon 8 Elite Gen 5, acompañado polo chip específico RedCore R4, que optimiza a resposta táctil e a estabilidade das taxas de fotogramas durante sesións prolongadas de xogo. Segundo os datos oficiais de Redmagic, a Astra 2 é quen de manter velocidades de fotogramas moi elevadas en títulos esixentes como Call of Duty Mobile, con medias superiores aos 145 FPS e unha temperatura contida grazas ao sistema de refrigeración AquaCore 2.0, que combina circulación líquida, metal líquido 3.0 e unha cámara de vapor de gran tamaño .
A pantalla é outro dos elementos clave: un panel OLED de 2.4K con frecuencia de actualización de ata 185 Hz e brillo máximo de 1600 nits, acompañado por un chip táctil Synaptics S3930T que permite unha resposta instantánea de ata 2000 Hz. A relación pantalla-corpo supera o 90 %, con biséis moi delgados que reforzan a sensación de inmersión visual .
A tableta integra unha batería de 8.300 mAh con carga rápida de ata 75 watts a través de dous portos USB-C, que tamén permiten activar a carga por derivación para reducir a calor durante as partidas. Redmagic asegura que o dispositivo pode superar as nove horas de uso continuo en xogos como Genshin Impact a 60 FPS, segundo as probas internas do fabricante .
A Astra 2 chega ademais con Android 16 e a capa Redmagic OS 11.5, pensada para ofrecer estabilidade baixo carga e unha experiencia fluída tanto en xogos como en tarefas cotiás. Inclúe conectividade Bluetooth 6.0 e Wi-Fi de alta velocidade, cámaras de 9 e 13 megapíxeles e compatibilidade con saída de vídeo por cable en 4K a 144 FPS ou 8K a 60 FPS, orientada a quen queira empregar pantallas externas para ampliar a experiencia de xogo ou traballo .

Messi e Cristiano Ronaldo inspiran un par de smartphones de luxo

Redacción — 2026-07-17T17:38:00Z

A marca de luxo Caviar presentou Legends, unha nova colección de edición limitada dedicada a figuras que marcaron a historia recente do fútbol. A primeira serie rende homenaxe á histórica rivalidade futbolística entre Lionel Messi e Cristiano Ronaldo mediante dúas edicións exclusivas de smartphones personalizados: un Samsung Galaxy Z Fold8 para o futbolista arxentino e un iPhone para o portugués.
Cada dispositivo incorpora un retrato elaborado artesanalmente coa técnica de esmalte hot cloisonné e rematado con detalles en ouro de 24 quilates (pureza 999). O deseño busca reflectir tanto os logros deportivos como as personalidades contrapostas dos dous xogadores.
O modelo dedicado a Messi baséase no Samsung Galaxy Z Fold8 (dispositivo que aínda non se presentou oficialmente) e emprega unha combinación de tons brancos e azuis para representar o estilo de xogo que a firma describe como refinado e discreto. A elección dun teléfono encartable pretende reforzar esa imaxe de elegancia e innovación.
Pola súa banda, a edición inspirada en Cristiano Ronaldo utiliza un iPhone 17 Pro/Pro Max como base. O seu deseño aposta por unha estética máis contundente para simbolizar o carácter competitivo e o liderado do futbolista portugués, asociando ademais o terminal de Apple coa idea de tecnoloxía de gama alta.
O lanzamento da colección coincide coa celebración do Mundial da FIFA, que previsiblemente será o último no que participen ambos os dous xogadores, e coa chegada ao mercado do Samsung Galaxy Z Fold8.
A colección estará limitada a só 19 unidades para todo o mundo. O Samsung Galaxy Z Fold8 personalizado de Lionel Messi partirá dos 13.130 dólares (uns 11.300 euros ao cambio actual), mentres que o iPhone dedicado a Cristiano Ronaldo terá un prezo inicial de 11.410 dólares (preto de 9.800 euros).

O Consello da Cultura valora a proposta do novo Plan da Lingua

Redacción — 2026-07-17T15:26:00Z

A presidenta do Consello da Cultura Galega (CCG), Dolores Vilavedra, reuniuse esta mañá co conselleiro de Cultura, Lingua e Xuventude, José López Campos, para analizar a proposta de actualización do Plan Xeral de Normalización da Lingua Galega, nun encontro no que tamén participou o secretario xeral da Lingua, Valentín García. A xuntanza serviu para constatar un elevado grao de coincidencia entre o documento elaborado pola Xunta e as propostas formuladas previamente polo CCG, aínda que a institución consultiva considera necesario concretar diversos aspectos antes de valorar plenamente a súa eficacia.
Vilavedra celebrou que a proposta presentada pola Xunta incorpore unha parte importante das conclusións do foro Un país coa súa lingua, promovido polo Consello da Cultura Galega e presentado o pasado mes de outubro. Segundo explicou, unha primeira análise comparada dos dous documentos revela que «moitas das medidas que propuxemos están incorporadas», aínda que persisten diferenzas no alcance dalgunhas actuacións e nos instrumentos previstos para a súa aplicación.
Entre os aspectos que o CCG considera necesario desenvolver figuran a planificación temporal, o cronograma de execución, a dotación económica, o carácter vinculante de determinadas medidas, os indicadores de seguimento e os mecanismos de avaliación e publicidade dos resultados.
A presidenta do Consello insistiu en que a planificación lingüística debe formularse cunha perspectiva a medio e longo prazo. «Cando falamos de lingua, a urxencia é un parámetro delicado. Cómpre actuar con decisión, pero tamén con planificación», sinalou, engadindo que o documento pode avanzar na definición dos prazos e das distintas fases de execución para construír «un proceso sólido, paso a paso».
Na valoración realizada polo CCG, destaca a ampla coincidencia co Executivo galego en materias como a tecnoloxía, a sanidade, o apoio ás familias ou o deporte. Pola contra, considera que o ensino continúa a ser un dos ámbitos con maior marxe de mellora. Vilavedra defendeu a necesidade de reflexionar sobre o modelo plurilingüe para situar «a lingua propia no centro da política educativa», como punto de partida para novas actuacións.
A responsable do Consello reiterou tamén a disposición da entidade para colaborar coas administracións públicas durante a seguinte fase de elaboración do plan. Segundo afirmou, o organismo quere exercer o seu papel asesor poñendo á disposición das institucións o coñecemento técnico acumulado para contribuír á mellora do documento e favorecer un consenso amplo arredor das futuras políticas lingüísticas.
Pola súa banda, López Campos agradeceu o apoio expresado polo Consello da Cultura Galega e destacou o clima de colaboración mantido durante o proceso de elaboración da proposta. O conselleiro cualificou a entidade como un actor que tivo «un peso moi importante» na actualización do Plan Xeral de Normalización da Lingua Galega e subliñou que numerosas achegas do CCG quedaron incorporadas ao texto.
O titular de Cultura, Lingua e Xuventude puxo en valor que o proceso permitise «poñer o idioma por enriba doutros debates que non favorecen á lingua» e definiu o resultado como «un documento estratéxico froito dun traballo intenso que recolle moitas achegas de entidades, axentes e sociedade en xeral», concibido como base para negociar e desenvolver as futuras políticas lingüísticas.
Tanto López Campos como Vilavedra coincidiron en cualificar a proposta como un documento «serio e viable», ao tempo que manifestaron a vontade de continuar o diálogo durante a seguinte fase de negociación e desenvolvemento do novo Plan Xeral de Normalización da Lingua Galega.

O videoxogo de divulgación científica de Alerta Verde (CINTECX) chegou a máis de 700 estudantes

S. P. — 2026-07-17T14:41:08Z

O Centro de Investigación en Tecnoloxías, Enerxía e Procesos Industriais (CINTECX) da Universidade de Vigo fixo balance da actividade xerada polo proxecto de divulgación científica Alerta Verde, financiado pola Fundación Española para a Ciencia e a Tecnoloxía (FECYT), que concluíu a súa primeira etapa tras achegar a ciencia a preto de 3.500 persoas en toda Galicia.
A axenda incluíu visitas a decenas de centros educativos e a participación en feiras científicas, co fin de “permitir que centos de mozos e mozas se achegasen por primeira vez á investigación, descubrisen o rol da enxeñaría na construción dun futuro sustentábel e comprendesen que a ciencia forma parte das solucións a moitos dos retos que afectan á vida cotiá da sociedade”, informou o CINTECX.
O principal eixe do proxecto foi o Tour Alerta Verde, que percorreu as catro provincias galegas e permitiu formar máis de 700 estudantes de ESO e Bacharelato a través dun videoxogo educativo no que debían resolver distintos desafíos científicos e tecnolóxicos para "salvar o seu centro educativo".
A isto sumouse unha xornada híbrida celebrada nas instalacións de CINTECX, na que máis de 134 estudantes percorreron laboratorios e infraestruturas de investigación en formato escape room.
A programación completouse, ademais, coas actividades organizadas durante as Xornadas de Portas Abertas da Escola de Enxeñería Industrial e coa presenza en feiras como Ponteciencia, Val Miñor é Ciencia, A Ciencia que Vén ou o Feelant Summit, onde tamén se exhibiron os pósteres científicos elaborados polo alumnado participante.
A experiencia transcendeu ademais o ámbito autonómico coa súa presenza no congreso internacional SciComPt 2026, contribuíndo a dar a coñecer a iniciativa entre profesionais da divulgación científica e público procedente de Portugal.
“A combinación de xogo, divulgación científica e interacción directa co persoal investigador permitiunos achegar conceptos complexos dunha maneira accesíbel e motivadora”. Así o destaca Paloma Pérez Fernández, profesora do IES Castro de Vigo, quen define a iniciativa como "unha bombona de osíxeno". Nesta liña, sinala que o proxecto supuxo "unha motivación para o alumnado, convertendo materias especialmente complexas nunha experiencia lúdica que xerou ganas de seguir ampliando coñecementos".
Un balance semellante realizan Alba Giráldez e Lea Melón, técnicas de apoio á investigación do centro da UVigo e responsábeis de coordinar o percorrido da iniciativa por toda Galicia. "Dous meses de ruta sen parar deixan un cansazo tremendo, pero tamén o orgullo de ter espertado e inspirado vocacións científicas xogando a Alerta Verde", explican.
Para ambas as dúas, un dos maiores logros foi comprobar de primeira man a resposta do alumnado. "Coordinar o tour polas catro provincias galegas foi un reto esgotador, pero ver ao alumnado aprender a través do videoxogo e das actividades de divulgación fai que cada quilómetro pagase a pena", destacan.
Aínda que o tour xa rematou, os recursos creados permanecerán a dispor da comunidade educativa e para calquera persoa interesada en descubrir como a ciencia axuda a afrontar os desafíos ambientais e enerxéticos do presente e do futuro. O videoxogo desenvolvido no marco do proxecto seguirá accesíbel a través da páxina web de CINTECX, permitindo que novas persoas poidan continuar xogando ao escape room e enfrontarse aos retos formulados durante esta primeira etapa.
Alerta Verde foi unha realidade grazas á Convocatoria de Axudas para o Fomento da Cultura Científica e da Innovación 2026 da FECYT e á Axuda para a Estrutura, a Mellora e o Apoio aos Centros de Investigación do Sistema Universitario de Galicia (CIGUS), co-financiadas por fondos europeos no marco do programa operativo FEDER Galicia 2021-2027.

PuntoGal reforza o seu compromiso cunha Internet máis segura xunto á IWF

S. P. — 2026-07-17T11:30:00Z

O dominio .gal confirmou a súa colaboración coa Internet Watch Foundation (IWF), organización internacional coa que traballa PuntoGal desde 2024 para reforzar a seguridade da comunidade galega en Internet. O obxectivo de PuntoGal é seguir avanzando na loita contra as principais prácticas fraudulentas detectadas na Rede.
A información facilitada periodicamente pola IWF permite a PuntoGal coñecer de primeira man a evolución das ameazas dixitais, mellorar os mecanismos de prevención e detectar con maior rapidez posíbeis usos maliciosos do dominio .gal.
A asociación galega lembra que nos últimos informes mensuais da IWF, esta identifica máis de cen dominios fraudulentos distribuídos entre diferentes dominios de nivel superior (TLD), que suman máis de cincocentas páxinas web con contido ilícito ao mes.
Unha parte importante destes casos responde ao denominado domain hopping ou salto de dominios. Esta técnica consiste en rexistrar unha mesma páxina fraudulenta baixo diferentes extensións de dominio mantendo a mesma identidade visual, marca ou contidos. Cando un dos dominios é bloqueado ou retirado, continúase a súa actividade desde outro, dificultando a detección e prolongando a vida destas campañas fraudulentas. PuntoGal lembra neste punto que “por cada dominio pódense atopar ata nove TLD rexistrados que permiten ata oito saltos entre páxinas web da mesma identidade”.
Nun último informe, rexistráronse arredor de catrocentos saltos de dominio, é dicir un total de 552 páxinas web con contidos maliciosos nos que un único TLD pode chegar a utilizarse en ata máis de trinta ocasións.
Ademais, a asociación galega salienta que IWF traballa de forma proactiva para identificar e actuar contra o posíbel material de abuso sexual infantil difundido na rede. “As tecnoloxías e servizos a disposición e ofrecidos por IWF axudan a procurar unha detección máis automatizada do contido ilícito en cuestión permitíndolles monitorar comportamentos abusivos, moderar usuarios sospeitosos e impedir a compartición do material”, explica PuntoGal, lembrando que os informes da IWF permiten facer un seguimento destas prácticas e incorporar esa información aos mecanismos de vixilancia de PuntoGal.
Unha vez máis, os datos confirman que o dominio .gal permanece libre deste tipo de actividade, consolidándose como un espazo seguro e de confianza para persoas, empresas e organizacións”, salientan dende a entidade xestora do dominio galego.
Coa sinatura do convenio de colaboración en setembro de 2024, PuntoGal reforzou o seu compromiso coa protección da comunidade na Rede e coa promoción dun ecosistema dixital baseado na confianza, a responsabilidade e as boas prácticas.

AMTEGA busca ideas para aplicar os xemelgos dixitais á xestión do turismo e do medio rural

Redacción — 2026-07-17T11:09:42Z

A Axencia para a Modernización Tecnolóxica de Galicia (AMTEGA) puxo en marcha o Concurso de Ideas do Xemelgo Dixital (XDG), unha iniciativa dirixida a identificar propostas innovadoras que empreguen tecnoloxías como a intelixencia artificial, a sensorización e os datos en tempo real para mellorar a xestión do territorio. O obxectivo é detectar solucións con potencial para converterse posteriormente en proxectos piloto desenvolvidos en colaboración coa Administración galega.
A convocatoria está aberta á participación de pequenas e medianas empresas, centros tecnolóxicos e centros ou grupos de investigación. As propostas deberán formular solucións baseadas no concepto de xemelgo dixital, é dicir, representacións virtuais alimentadas por datos que permitan analizar situacións, simular escenarios e optimizar a toma de decisións.
O certame estrutúrase arredor de dúas áreas estratéxicas. A primeira céntrase no medio rural, onde se buscan iniciativas relacionadas coa planificación territorial baseada en datos, a recuperación de terras, o control de especies, a protección gandeira, a xestión da auga, os cultivos intelixentes, a trazabilidade alimentaria ou as comunidades enerxéticas. A segunda está orientada ao turismo e procura ferramentas capaces de mellorar a xestión dos fluxos de visitantes, anticipar situacións de saturación, modelizar o Camiño de Santiago, analizar a ocupación dos albergues ou estudar o perfil dos visitantes.
Entre todas as candidaturas seleccionaranse seis ideas finalistas, tres por cada ámbito temático, que recibirán difusión a través das canles da Administración autonómica. Ademais, escolleranse dúas propostas gañadoras, unha en turismo e outra en medio rural, coa intención de que poidan evolucionar nunha fase posterior cara á súa implantación como proxectos piloto.
As solucións deberán desenvolverse tendo en conta a Plataforma Territorio Intelixente (PTI), a infraestrutura tecnolóxica da Xunta de Galicia deseñada para facilitar a integración dos proxectos cos sistemas da Administración e favorecer o aproveitamento dos datos dispoñibles.
O xurado estará integrado por representantes da Axencia Galega de Desenvolvemento Rural (AGADER), Turismo de Galicia e AMTEGA. A avaliación das propostas repartirase nun máximo de 100 puntos segundo cinco criterios.
O aspecto con maior peso será a consistencia e viabilidade da proposta, que poderá acadar ata 35 puntos. Valorarase a claridade da solución presentada, a súa coherencia, o seu realismo e a correcta identificación dos datos necesarios para facela realidade.
A adecuación ao modelo de xemelgo dixital e á administración orientada ao dato representará ata 25 puntos. Neste apartado analizarase que o uso do xemelgo dixital estea plenamente xustificado como elemento central da proposta e a súa capacidade para integrarse cos datos e sistemas da Administración.
O impacto e a innovación achegarán un máximo de 20 puntos. O xurado examinará o carácter innovador da idea e as melloras que poida introducir na xestión territorial, nos servizos públicos e na atención á cidadanía.
A viabilidade económica terá un peso de 10 puntos, centrados na sustentabilidade da proposta e na eficiencia dos custos previstos para o seu desenvolvemento, implantación e mantemento.
Os 10 puntos restantes corresponderán á replicabilidade e escalabilidade da solución, valorando a súa capacidade para ser transferida ou adaptada a outros ámbitos temáticos ou territorios diferentes.

Netflix recoñece o uso da IA xenerativa en centos das súas producións

Redacción — 2026-07-17T10:53:56Z

Netflix pechou o segundo trimestre de 2026 cun incremento interanual do 13 % nos ingresos, ata alcanzar os 12.560 millóns de dólares, mantendo unha marxe operativa do 33,4 % e un beneficio neto de 3.401 millóns de dólares. A compañía considera que os resultados están aliñados cos seus obxectivos anuais e elevou a precisión das súas previsións, situando a facturación prevista para o conxunto do exercicio entre 51.000 e 51.400 millóns de dólares, mantendo unha marxe operativa do 31,5 %.
A carta aos accionistas deixa claro que a intelixencia artificial converteuse nun dos piares estratéxicos da empresa, xunto coa ampliación da oferta de entretemento e o reforzo da monetización. Netflix presenta a IA como unha tecnoloxía transversal que xa está a modificar tanto a experiencia dos usuarios como os procesos internos de produción audiovisual e o funcionamento da súa plataforma publicitaria.
Están a empregar grandes modelos lingüísticos (LLM) para mellorar o descubrimento de contidos e comprender con maior precisión as preferencias dos abonados. A intelixencia artificial tamén sustenta as novas funcións de busca por voz e a busca mediante linguaxe natural, co obxectivo de ofrecer recomendacións máis personalizadas e unha interacción máis intuitiva coa plataforma. Segundo explica Netflix, a intención é construír unha experiencia máis personalizada, inmersiva e interactiva para os usuarios.

Normalización do uso da IA xenerativa

: El Experimento Estadounidense é unha das producións de Netflix que fixo uso da IA xenerativa

O avance máis significativo sitúase, porén, na produción audiovisual. A compañía afirma que os fluxos de traballo baseados en IA xenerativa xa foron empregados en preto de 300 títulos durante 2026, concentrándose especialmente nas fases de posprodución. A tecnoloxía esténdese desde as primeiras etapas de conceptualización e previsualización ata a entrega final das producións.
Netflix sostén que estas ferramentas permiten obter resultados de maior calidade en menos tempo e cun custo inferior ao dos métodos tradicionais. Ademais, asegura que nalgunhas producións determinadas escenas non poderían terse realizado sen recorrer á IA xenerativa. Entre os exemplos citados figuran Gloria (India), Brasil 70: La Saga del Tricampeonato (Brasil) e El Experimento Estadounidense (Estados Unidos), nas que se empregaron estas tecnoloxías para crear secuencias complexas como multitudes ampliadas dixitalmente, recreacións de batallas históricas e planos xerais de construción de escenarios.

Medra o negocio publicitario

A publicidade constitúe outro dos ámbitos nos que Netflix está a acelerar a integración da IA. Durante o segundo trimestre ampliou o uso de ferramentas baseadas nesta tecnoloxía ao longo de todo o ciclo das campañas publicitarias, desde a planificación e a xeración de creatividades ata a xestión, optimización e elaboración de informes. A compañía tamén está a automatizar os procesos de contratación de campañas mediante o acceso programático aos anuncios en pausa e ao inventario das emisións en directo, reducindo o traballo manual e facilitando a incorporación de anunciantes de menor tamaño.
Este desenvolvemento encaixa coa forte aposta polo negocio publicitario. Netflix prevé aproximadamente duplicar os ingresos desta área durante 2026 ata alcanzar arredor de 3.000 millóns de dólares, impulsados tanto polo crecemento da modalidade con anuncios como polas novas capacidades tecnolóxicas da plataforma publicitaria Netflix Ads Suite e os sistemas de automatización baseados en IA.

Resultados financeiros e de consumo

No plano financeiro, o crecemento continúa apoiándose no aumento de abonados, as subas de prezos e a expansión da publicidade. A empresa destaca que superou por primeira vez os 4.000 millóns de dólares trimestrais de ingresos na rexión EMEA e os 1.500 millóns tanto en América Latina como na rexión Asia-Pacífico. As modificacións de prezos aplicadas en mercados como España, Estados Unidos e México evolucionan, segundo a compañía, conforme ás previsións iniciais.
Netflix tamén subliña que o consumo segue medrando. Durante o primeiro semestre de 2026 os usuarios visualizaron máis de 97.000 millóns de horas de contido, un 2 % máis que un ano antes, cun peso crecente das producións internacionais, que xa representan máis dun terzo do visionado total. A empresa continúa ampliando o catálogo con videopodcasts, contidos de creadores dixitais, xogos na nube e acordos con medios tradicionais para reforzar o tempo de permanencia dos usuarios na plataforma.

O XII Congreso Nacional de Bibliotecas Móbiles celebrarase en Santiago e porá o foco nas novas ferramentas

S. P. — 2026-07-17T10:26:45Z

O director xeral de Cultura, Anxo M. Lorenzo, participou este venres 17 de xullo na presentación do XII Congreso Nacional de Bibliotecas Móbiles, un encontro que este ano se vai celebrar na Cidade da Cultura, do 23 ao 25 de outubro, coa colaboración do Goberno galego. Na cita cos medios estivo acompañado por Roberto Soto, presidente da Asociación de Profesionales de Bibliotecas Móviles.
O eixe central do congreso xirará arredor da garantía dos dereitos culturais e a igualdade de acceso á información, sen importar as barreiras xeográficas. Un dos bloques básicos do congreso será o bloque da modernización e sustentabilidade, no que se abordarán os retos do sector fronte á transformación dixital, o uso de novas tecnoloxías e a xestión sustentábel dos vehículos. Tamén haberá unha exposición de bibliobuses (unha mostra física de vehículos e proxectos de diferentes puntos do país para compartir deseños e loxísticaI) e entregaranse os Premios ACLEBIM (galardóns aos proxectos e profesionais máis destacados no sector das bibliotecas móbiles).
Na cita deste venres 17 de xullo Anxo Lorenzo puxo en valor “o gran servizo de dinamización cultural e fomento da lectura que ofrecemos desde a Xunta a través de A Furgoteca, coa que chegamos a 30 concellos de Ourense e Lugo que non contan con equipamentos bibliotecarios”.
Lorenzo lembrou que as tres rutas que viaxan con libros e actividades polo interior de Galicia “responden ao noso compromiso de achegar a cultura a todas partes de acordo coa Lei de cultura inclusiva e accesible de Galicia”. Ademais, engadiu, “trátase dun importante recurso no marco da programación da campaña de verán Para gustos, cultura, co que chegamos este ano 200 concellos”.
Deste xeito, cómpre destacar que A Furgoteca levou a cabo no 2025 un total de 560 actividades culturais ás que asistiron 10.300 persoas, mentres que os préstamos medraron un 37% con respecto ao ano anterior chegando aos 1.799 usuarios.
Sinalou tamén que o devandito congreso, baixo o lema Bibliobuses. Dereitos sen barreiras, contará con relatorios que serán “unha oportunidade de compartir as experiencias dos distintos territorios ao redor das bibliotecas móbiles para seguir mellorando entre todos”.
O representante da Xunta mostrou a súa ledicia porque Galicia acolla este ano un congreso para o que está aberto o prazo de presentación dos relatorios, cuxo contido deberá estar centrado na aplicación das tecnoloxías nos servizos bibliotecarios móbiles, na planificación e organización deste tipo de redes, e nas técnicas para o fomento lector a través desta ferramenta. Para participar na exposición de casos pódense enviar as propostas a bibliobuses@aclebim.es.

As televisións autonómicas españolas queren coproducir un filme conxuntamente

Redacción — 2026-07-17T09:42:55Z

A Federación de Organismos de Radio e Televisión Autonómicos (FORTA) abriu unha convocatoria dirixida ás produtoras audiovisuais para seleccionar a que será a primeira longametraxe de ficción coproducida de maneira conxunta polas televisións públicas autonómicas integradas na entidade. A iniciativa pretende reforzar a colaboración entre os operadores rexionais e impulsar a industria cinematográfica estatal.
A convocatoria está aberta a produtoras externas e contempla a selección dun único proxecto de ficción cunha duración de entre 90 e 120 minutos. Quedan excluídos os documentais, as producións de animación e os proxectos experimentais. A obra deberá contar cun orzamento mínimo de 2 millóns de euros.
Na avaliación das propostas valorarase especialmente a capacidade da historia para conectar cun público interxeracional e a súa adecuación para unha futura emisión televisiva en horario de máxima audiencia. Ademais, en liña co compromiso de FORTA coa diversidade lingüística, o proxecto deberá presentarse na súa versión orixinal e tamén nas demais linguas oficiais ou recoñecidas estatutariamente nas comunidades autónomas representadas na federación.
As solicitudes poderán presentarse entre o 17 de xullo e o 30 de outubro a través da páxina web de FORTA.
O presidente de FORTA e director xeral de À Punt, Paco Aura, destacou a relevancia desta iniciativa ao afirmar: «Esta colaboración é un gran paso adiante para FORTA e para o noso sector audiovisual. Por primeira vez, unimos recursos para impulsar unha longametraxe de ficción que fortalece a industria e promove a nosa riqueza lingüística e cultural».

Red.es forma a máis de 186.000 persoas en competencias dixitais básicas, 13.500 en Galicia

S. P. — 2026-07-17T09:09:56Z

O programa Competencias Dixitais Básicas concluíu con máis de 186.000 persoas no marco da iniciativa Xeración D (Generación D) a través de cursos presenciais impartidos en todas as comunidades e cidades autónomas. Impulsado por Red.es, entidade adscrita á Secretaría de Estado de Dixitalización e IA, e cun orzamento de 45 millóns de euros de Fondos Next Generation EU, ata o pasado 30 de xuño o programa impartiu preto de 1,5 millóns de horas de formación con cursos de 8 horas de duración, sendo máis do 60% das persoas formadas mulleres.
En Galicia o programa concluíu con preto de 13.500 persoas formadas en Galicia no marco da iniciativa Xeración D, con máis de 1.700 edicións e preto de 107.500 horas de formación presencial.
A metodoloxía do programa baseouse en formación presencial en grupos reducidos, deseñada para favorecer unha aprendizaxe práctica e adaptada ás necesidades de cada participante. Foi, en palabras de Red.es “unha fórmula especialmente axeitada para os colectivos destinatarios do programa: persoas maiores de 60 anos, con discapacidade, vulnerábeis e sen competencias dixitais básicas”.
As persoas participantes adquiriron coñecementos en competencias dixitais que lles axudarán na súa vida cotiá para participar de forma activa na sociedade dixital, como realizar trámites coas administracións públicas, utilizar aplicacións de banca e compras enliña, comunicarse mediante ferramentas dixitais, navegar de forma máis segura por Internet ou utilizar recursos dixitais orientados á procura de emprego e a mellora profesional.
Ademais da formación, os asistentes contaron con titorías para resolver dúbidas e reforzar os coñecementos adquiridos durante os cursos.
Os itinerarios formativos organizáronse en sete áreas temáticas: A túa contorna dixital, Xestión do tempo libre, Comunicación e redes sociais, Seguridade e protección, Mellora a túa vida laboral, Ideas para o teu negocio e Benestar dixital e acompañamento.
A temática con maior participación foi A túa contorna dixital, centrada no uso práctico da tecnoloxía para as xestións habituais da vida cotiá.
As accións formativas desenvolvéronse na totalidade das comunidades autónoma e provincias, así como en Ceuta e Melilla.
Ao longo da execución do programa formouse a unha media de 730 persoas cada día, logrando contar con 16.000 participantes ao mes durante 2026.
A execución dos cursos realizouse a través de dez entidades de referencia no ámbito da formación aos colectivos obxecto do programa, seleccionadas por convocatoria pública: Fundación ONCE, Fundación La Caixa, Fundación Secretariado Gitano, Adecco Formación, Telefónica Educación Dixital, Euroformac, G12 Grupo Empresarial de Servicios, Fundación Orange, Orange e Fundación Cibervoluntarios.
A finalización do programa coincide coa publicación do Informe sobre o Estado da Década Dixital 2026 da Comisión Europea. Segundo os datos de Eurostat utilizados neste informe, o 66,5% da poboación española de entre 16 e 74 anos conta con, polo menos, competencias dixitais básicas, fronte ao 60,4% da media da Unión Europea.
O informe destaca, ademais, o papel de Red.es na execución da estratexia dixital española e recoñece a contribución de iniciativas impulsadas pola entidade en ámbitos como a capacitación dixital da cidadanía, a dixitalización empresarial e o impulso á intelixencia artificial.